Almaty qalasy Densaýlyq saqtaý basqarmasy jáne Salaýatty ómir saltyn qalyptastyrý ortalyǵynyń uıymdastyrýymen Astana alańynda «Densaýlyq festıvali – 2018» ótti.
Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn júzege asyrýǵa baǵyttalǵan festıval qala turǵyndary men qonaqtaryna tegin keńester berýden bastaldy.
«Densaýlyq qalashyǵy» sheńberinde 500-den astam kelýshige tegin medısınalyq kómek kórsetilip, keńester berildi. Qala turǵyndary terapevt, jalpy tájirıbedegi dárigerler, kardıolog, nefrolog, t.b. mamandardan qan qysymyna, artyq salmaqqa qatysty keńester aldy.
Qoǵamda salaýatty ómir saltyn nasıhattaý maqsatynda ótkizilgen shara aıasynda qan quramyndaǵy holesterındi anyqtaý, juqpaly jáne juqpaly emes aýrýlardyń qalaı paıda bolatyndyǵy týraly, sondaı-aq JQTB-ǵa qatysty aqparattar berilip, tekserilýge ynta bildirgenderge dárigerlik kómek kórsetildi.
Elvıra Serikqyzy,
«Egemen Qazaqstan»
ALMATY